21-01-2016Apresentou-se em Compostela a Associaçom de Estudos GalegosCategoria: Língua/Educaçom Publicado em Domingo, 17 Janeiro 2016 14:33
O panorama reintegracionista vem alargar a extensom de coletivos, com um que incorpora pessoas defensoras do idioma e da unidade lingüística galego-luso-brasileira pertencentes a diversas áreas do conhecimento e do ativismo. Todas elas formam um grupo promotor para a formaçom da Associaçom de Estudos Galegos, que se apresentou publicamente neste sábado na capital galega. No ato, que decorreu ao pé do Panteom de Galegos Ilustres, tomárom a palavra três integrantes desse núcleo inicial: Joám Lopes Facal, Helena Sabel e Carlos Garrido. O veterano economista Joám Lopes Facal defendeu a trajetória das pessoas com longa experiência ativista e inteletual que se encontram no novo projeto reintegracionista, assim como o valioso contributo de pessoas jovens que também se somam a um novo projeto que aspira a colaborar com outras entidades normalizadoras no caminho da plena normalizaçom idiomática. Também Helena Sabel incidiu nos objetivos normalizadores da Associaçom de Estudos Galegos, avaliando negativamente os resultados da política lingüistica aplicada por parte do poder e apelando a umha mudança de rumo que permita o reencontro do povo galego com a sua língua.
Representantes da nova entidade, que nasce coincidindo com o centenário das Irmandades da Fala, oferecêrom a disponibilidade da AEG, que inicia o seu processo pré-assemblear, para a colaboraçom com todos os coletivos locais, setoriais e nacionais que trabalham pola plena hegemonia do galego no nosso país. Também anunciárom a imediata publicaçom de novos materiais de apoio às entidades e pessoas utentes do padrom reintegracionista galego. O ato concluiu com a música do sanfoneiro Ariel Ninas. O grupo promotor que lança a entidade é formado por: Afonso Mendes Souto, Corunha; Alba Marinha Souto, Compostela; Álvaro Garrido Rodrigues, Ourense; Beatriz Bieites, Compostela; Carlos Garrido Rodrigues, Vigo; Dores Valcárcel Guitiám, Corunha; Eva Cortinhas Ferreira, Marinha; Gonçalo Gonçales, Munique, Alemanha; Helena Sabel, Compostela; Jacobe Pintor, Lugo; Jesus Miguel Conde, Vigo; Joám Lopes Facal, Costa da Morte; Joám Luís Ferreiro Caramês, Ferrol; Jorge Rodrigues Gomes, Vigo; José A. Corral Iglésias, Corunha; José António Souto Cabo, Compostela; José Cadaveira, Compostela; Luzia Jurjo, Compostela; Maca Igrejas, Compostela; Marcos Lopes, Compostela; Maria Vila Verde, Lugo; Maurício Castro Lopes, Ferrol; Paulo Painceiras, Compostela; Paulo Valério Árias, Corunha; Pim Patinho Penya, Ferrol; Raquel Paz Lopes, Narom. Fotos. Associaçom de Estudos Galegos
"culturas" |
